بمؤتمر سيدر، اتدين الرئيس سعد الحريري بإسم كل لبناني حي أو رح يخلق مبلغ ١١ مليار دولار..
وحتى يدينوه، قدم دولته تعهد لدول العالم بمكافحة الفساد، الفساد يلي هو أساسا سبب ضياع ٨٠ مليار، وضياع موارد المي والاتصالات والضرايب، بينما الدولة مفلسة ومجبرة تتدين..
بس فريق رئيس الحكومة غير، فريق مؤلف من ناس نضاف ع راس مراكزهم، بيشتغلو ليل نهار، وكل همهم كيف يوفروا عالدولة ويحافظوا ع المال العام..
ومن صقور هالفريق صاحب الكف النضيف، الأمين حامل أمانة القديسين، سيد الأمان يلي كلنا عايشين فيه اليوم، معالي وزير الداخلية نهاد المشنوق.
معاليه قد ما نضيف وبحب يوفر عالمال العام، قرر انه يصرف يوم الانتخابات ٢ مليون ٥٠٠ الف دولار ثمن قرطاسية..
كيف ؟!!
بسيطة، عدوا معي ..
عندكم ٨٠٠٠ كف مطاط كل كف حوالي ٢٠٠٠ ليرة.. عمكم علي اكسبرس عندو العلبة فيها ١٠٠ كف بـ ١٦٠٠٠ واصلة ع الصنايع ..
اصابع الشمع لختم المغلفات، كل اصبع بعيد عنكم ب ٦٠٠٠ ليرة..
لزقة وزارة الداخلية مع كيس نايلون لعلبة الحبر ب ٨٠٠٠ ليرة، يعني بدنا ندفع ١٠٠ الف دولار حق لزقات واكياس.. بينما سعرها بالسوق، اقل من دولار!! أقل من دولار يا نضيف يا لزقة..
اما الحبر، هون النضافة، هون النزاهة، وهون الاستقامة.. كل علبة حبر ب ٥٠ دولار.. بينما عند عمك علي في علب مثلها ب 3 دولار، وببيروت حق العلبة من ذات النوع 11 دولار، وبلا مكاسرة، سعر اولي يعني ..
وهيك بالمشبرح يا صديقي المواطن، كل ما تغط اصبعك لتصوت للوزير المرشح وكل كتلته والطبقة السياسية الحاكمة، رح يردلك الجميل ويمدلك اصبعه، لان كل غطة فيها مربح.. وحبر من ذهب.
